ՀՀ Սփյուռքի նախարարության նախագիծ
Այսօր` 26 / 6 / 2017
Որոնում`
 
Օրացույց
 
Սփյուռք
13.05.2013

Ռաուտայի Մէջ Շուշիի Ազատագրութեան 21-ամեակի Ժողովրդային Տօնակատարութիւն
Կազմակերպութեամբ ՀՅԴ «Շուշի» կոմիտէին մայիս 12-ին Ռաուտայի դաշտին մէջ տեղի ունեցաւ Շուշիի ազատագրութեան 21-ամեակի ժողովրդային տօնակատարութիւն` ներկայութեամբ շրջանի բնակչութեան:
Լիբանանի, Հայաստանի եւ Արցախի քայլերգները լսելէ ետք, ՀՅԴ «Շուշի» կոմիտէին անունով խօսք առաւ Կիրակոս Գարակէօզեան, որ նշեց, թէ Արցախի ժողովուրդը 21 տարի առաջ շնորհիւ իր անվախ ու զոհուող ֆետայիներուն ծունկի բերաւ վայրագ թշնամին եւ ապացուցեց, որ 20-րդ դարու աւարտին իսկ կարելի է հայրենիք ազատագրել` ջրելով այն բոլոր անիմաստ խօսքերը, թէ այլեւս ազատատենչ ժողովուրդներու համար յաղթանակներու ժամանակը վերջ գտած է:
Գարակէօզեան նշեց, որ հայութիւնը եւ ի մասնաւորի դաշնակցական երիտասարդութիւնը պէտք է հաւատարիմ մնան պահանջատիրական ոգիին եւ այդ շունչը փոխանցեն նորահաս սերունդներուն:

Օրուան բանախօսն էր ՀՅԴ Լիբանանի Կեդրոնական կոմիտէի անդամ Յովիկ Պերթիզլեան, որ նշեց, թէ արցախեան ազատագրական պայքարի ընթացքին Շուշիի ազատագրումը մարտահրաւէր էր, որովհետեւ  կարելի չէր շրջափակուած վիճակի մէջ շարունակել պայքարը: Պերթիզլեան ըսաւ, որ յաղթանակին գլխաւոր գործօնը հայ զինուորին կորովն էր, յաղթանակի համոզումն էր, այլապէս կարելի չէր նուաճում արձանագրել:

Բանախօսը հաստատեց, որ Շուշիի յաղթանակը հայութեան համար հոգեբանական եւ մտածողութեան փոփոխութիւններ յառաջացուց, որովհետեւ Շուշիէն ետք հայութիւնը թուրքին յաղթած ժողովուրդ է, յաղթանակ կերտած հաւաքականութիւն է: Այս շրջագիծին մէջ Պերթիզլեան աւելցուց, որ Շուշիի յաղթանակը Հայ դատի պայքարին մէջ յառաջիկայ հանգրուանին ունի իր մեծ կարեւորութիւնն ու արժէքը:

Յովիկ Պերթիզլեան հաստատեց, որ իւրաքանչիւր հայ պէտք է հայ ժողովուրդի պատմութեան կերտումին մասնակից դառնայ, եւ այսօր հայութեան ուշադրութեան կեդրոնը պէտք է հանդիսանայ Արեւմտահայաստանը, ուր կայ մեծ աշխատանք, ուր գոյութիւն ունեցող գլխաւոր նպատակը ազատագրումն է եւ այս ծրագիրին իրականացման առաջին քայլը ծանօթացումն է, իրավիճակին մօտէն հետեւիլն է:

Իր խօսքի աւարտին Պերթիզլեան յայտնեց, որ անկախ եւ միացեալ Հայաստանը կը կերտուի, երբ ունինք Քրիստափոր Միքայէլեանի յարատեւ պայքարի ոգին եւ փշոտ ու երկար ճամբան յաղթահարելու կամքը: Ան Դրոյին խօսքը մէջբերելով հաստատեց, որ ով որ Շուշիին տիրած է, ապա վաղը կրնայ տիրել Արեւմտահայաստանին:

Գեղարուեստական յայտագիրին ազգային-հայրենասիրական երգերով իրենց մասնակցութիւնը բերին Շաքէ Պաղտասարեան, Ալիս Իփրաճեան, Լուսին Տեմիրճեան եւ Գօգօ Արոյեան, որոնց կ՛ընկերակցէր Սեդօ Պաղտասարեանն ու իր նուագախումբը:

Շուշիի ազատագրութեան 21-ամեակի հանդիսութիւնը փակուեցաւ գեղարուեստական յայտագիրի մասնակիցներու «Արիւնոտ դրօշ» երգի միացեալ կատարումով եւ հրավառութեամբ:

«Ազդակ»

|

 
 
ԲՈԼՈՐ ՆՈՐՈՒԹՅՈՒՆՆԵՐԸ
© «Հայերն այսօր» էլեկտրոնային պարբերական
ՀՀ Սփյուռքի նախարարություն
Պատրաստված է ZOOM GRAPHICS -ում
© «Հայերն այսօր» էլեկտրոնային պարբերական
ՀՀ, ք. Երեւան,0002, Սարյան 22
Հեռ.` 53-09-38